سەرۆکی حکومەت ئەنجامدانی چەندین پڕۆژە لە سنووری هەردوو قەزای ئاکرێ و بەردەڕەش ڕادەگەیەنێت

سەرۆکی حکومەت : خەڵكی ئەم دەڤەرە شایستەی ئەوەیە زۆر زیاتر خزمەتی بكرێت

ئەمڕۆ دووشەممە 5/22 مەسرور بارزانی سەرۆکی حکومەتی هەرێمی کوردستان سەردانی شاری ئاکرێی کرد و لە کۆبوونەوەیەکی جەماوەریدا ، ئەنجامدانی ژمارەیەک پڕۆژەی لەو ناوچەیە ڕاگەیاند لە نێویاندا دامەزراندنی زانکۆیەک ئاکرێ بە ناوی زانکۆی زانستە کردارییەکانی ئاکرێ . هەروەها زانکۆیەکی دیکەش لە گەرمیان دروست دەکرێ بە ناوی زانکۆی پۆلیتەکنیکی گەرمیان .

ئەمەش دەقی گوتاری سەرۆکی حکومەتی هەرێمی کوردستانە:

بە ناوی خوای مەزن و دلۆڤان
خوشك و برایانی هێژا
ئامادەبووانی قەدرگران

سوپاس بۆ ئامادەبوونی ئێوە. من زۆر خۆم بە بەختەوەر دەزانم كە بێم و لە خزمەتی ئێوەدا بم. من پێم خۆش بوو زووتر بێین، هاتنمان بۆ ئێرە هەندێك درەنگ کەوت هەرچەندە پێش ئێستا من هاتم، بەڵام پێم خۆش بوو بێین هەندێك دەستكەوتی حكومەت لێرە لەگەڵ ئێوە باس بكەین، نەک تەنیا بێین بەڵێن بدەین. بەڵکو بێین باسی ئەو پڕۆژانەی كراون بکەین و بە ئێوە بڵێین ئەم پرۆژانە كراون، ئەو پرۆژانەی دیش كە بەردەستن، ئینشەئەڵڵا لە داهاتوو بكرێن.
پێش ئەوەی بێمە سەر داوا و پرۆژەكانی دەڤەری ئاكرێ و بەردەڕەش، یەك دوو بابەتی گشتی هەن كە من دەمەوێ ئاماژەیان پێ بدەم، ئەویش پەیوەندیی هەرێمی كوردستان لەگەڵ حكوومەتی فیدرالیی بەغدا كە ئێمە گەیشتووینەتە كوێ؟ دووەم دۆخی ناوخۆی هەرێم. بە كورتی هەندێك خاڵ هەن دەمەوێ ئاماژەیان پێ بدەم.
لەگەڵ حكوومەتی عێراق، ئێمە زۆر هەوڵمان دا بگەینە ڕێككەوتنێك لەگەڵ ئەو حكومەتە تازەیە و بەڕێز محەمەد شیاع سوودانیی سەرۆك وەزیران، لەسەر بابەتی نەوت و بودجە و ئەو بابەتانەی كە كێشەیان لەسەر هەیە لە نێوان بەغدا و هەرێمی كوردستان. ئەو شتانەی لەسەر هەرێمە، چ پێویست بووە ئێمە كردوومانە و هەر ئەركێك كەوتبێتە سەر هەرێمی كوردستان و خەڵكی هەرێم و حكوومەتی هەرێم، ئێمە بە زیادەوە جێبەجێمان كردووە، چاوەڕێین حكوومەتی فیدرالیش ئیلتزام بە بەڵێنەكانی خۆیەوە بکات و ئەو ڕێككەوتنەی ئێمە لەگەڵیاندا كردوومانە، بە دروستی جێبەجێ بكات كە بە پێشبینیی ئێمە نەك تەنیا خزمەتی هەرێمی كوردستان دەكات، بەڵكوو دەبێتە دەرگای خێر بۆ هەموو عێراقیش.
ئێمە چاوەڕێین بودجەی بەغدا و بودجەی حكوومەتی عێراقیش پەسەند بكرێت، كە ئەویش دەرگایەكی دیكەی خێر دەكاتەوە لە ڕووی ئابوورییەوە. هەرچەندە لەم ماوەیە زۆر فشاری ئابووری لەسەر هەرێمی كوردستان هەبوو. ئێوەش دەزانن ئەوە نزیكەی دوو مانگە نەوتی هەرێمی كوردستان هەناردە ناكەین، سەرەڕای ئەوەش نەمانهێشتووە پرۆژەكان لە هەرێمی كوردستان بوەستن، مووچەی فەرمانبەرانی حكوومەتیش ڕاستە دواكەوتووە، بەڵام ئێمە ئەوەی پێمان كراوە، كردوومانە و مووچەی ئەوانمان داوە، ئەوەیشی هەیە پابەندییە لەسەر حكوومەت و ئینشائەڵڵا مووچەی خەڵكی هەرێمی كوردستان و فەرمانبەرانی حكوومەت بدەین. بەڵام ئێمە چاومان لەوە هەیە كە حكوومەتی عێراق بەبێ فەرق و جیاوازی، ئەو ئیلتزاماتەی كە دەكەوێتە سەر حكوومەتی فیدرالی لە بەرامبەر ماف و شایستە داراییەكانی هەرێمی كوردستان، جێبەجێی بكات.
لەبارەی دۆخی ناوخۆی هەرێمی كوردستان، هەروەك ئێوە بینیتان، پێش چەند ڕۆژێك، جەنابی سەرۆك لە بارزان، لە بۆنەی یادگەی بارزانیی نەمر كە لە بارزان كرا، بانگەوازێكی ئاراستەی هەموو خەڵكی هەرێمی كوردستان كرد بۆ ئەوەی لاپەڕەیەكی نوێ بكەنەوە، بۆ خاتری ئاشتەوایی نیشتمانی و بەرژەوەندیی گشتیی خەڵكی كوردستان، كێشە و ئاریشە بخەنە لایەك و هەموو پێكەوە هەوڵبدەن خزمەتی خەڵكی كوردستان بكەن.
هیوادارم هەموو لایەك ئەم بانگەوازە وەكوو خۆی وەربگرن و بێنە پێشەوە و خزمەتی خەڵكی كوردستان و خزمەتكردنی خەڵكی كوردستان و بەرژەوەندیی وڵات و خاكی ئێمە بخەنە پێش بەرژەوەندیی تەسكی حزبی یان شەخسی.
ئەوەی لەسەر حكومەتی هەرێمی كوردستانە، ئێمە جێبەجێمان كرد و هەنگاوی باشمان نا، ئێوە دەزانن پێش ماوەیەك هەندێك كێشە و ئاریشە هەبوو لەنێو كابینەی حكومەت، هەندێك وەزیر و ئەندامانی كابینەی حكوومەت لە برایانی یەكێتی بەشدار نەبوون و ماوەیەك نەدەهاتنە كۆبوونەوە، بەڵام پاش ئەو دەستپێشخەرییە و هەندێك كۆبوونەوە كە ئێمە لەگەڵ ئەوان دەمانكرد، لە هەفتەی رابردوو كۆبوونەوەی ئەنجوومەنی وەزیران، بە ئامادەبوونی هەموو وەزیرەكان و جێگری سەرۆك وەزیرانیش كرا و هیوادارین ئەم كۆبوونەوانە بەردەوام بن بۆ ئەوەی ئێمە زیاتر سەرنج بخەینە سەر خزمەتكردنی خەڵكی خۆمان، ئەگەر كێشەی حزبی و سیاسیش هەبن، ئەو كێشانە لەسەر ئاستی حزبی و لەنێوان حزبەكان چارەسەر بكرێن، بەڵام حكومەت وەك حكومەتێكی خزمەتگوزار، نەكەوێتە نێو ئەو ململانێ حزبییانە.
ئەمڕۆش ئێوە بینیتان كە پەرلەمان بڕیاری ئەوەی دا كە هەڵبژاردن بكرێت لە ڕێگەی كاراكردنی ئەنجوومەنی كۆمسیۆنی باڵای هەڵبژاردن. من دەستخۆشی لە ئەندامانی پەرلەمان دەكەم بۆ وەرگرتنی ئەم بڕیارە گرنگە، چونكە بەڕاستی شەرعیەتی هەرێمی كوردستان لە لایەن دۆستانی ناوخۆ و دەرەكی دەكەوێتە ژێر پرسیارەوە كە ئایا خەڵكی كوردستان باوەڕیان بە دیموكراسیەت و پرۆسەی هەڵبژاردن هەیە یان نا؟ ئەگەر ئاریشەش هەبن ئەو ئاریشانە دێنە چارەسەركردن، بەڵام هیچ شتێك نابێ ڕێگربێ لەوەی كە هەڵبژاردن نەكرێت، لەبەر ئەوە ئەو بڕیارەی دەركراوە، پشتڕاستكردنەوەیەكە كە خەڵكی كوردستان باوەڕیان بە پرۆسەی دیموكراسی و هەڵبژاردن هەیە و هیوادارم لە كاتی خۆیشیدا لە كۆتایی ئەمساڵ ئەو هەڵبژاردنە بكرێت.
لەبارەی دۆخی هەردوو قەزای ئاكرێ و بەردەڕەش، من خۆشحاڵم كە گوێم لە هەندێك ژمارە و داتا بوو، پێش ئێستاش پێیان گوتم كە چەند پرۆژە لێرە ئەنجام دراون، جێی دەستخۆشییە. من دەزانم خەڵكی ئەم دەڤەرە شایستەی ئەوەیە كە خزمەتێكی زۆر زیاتری بكرێت، ئێمە هەموو شایەدین لە شەڕی بەرگریكردن لە شەرعیەت و لە شەڕی تیرۆریزم چەندە خەڵكی ئەم دەڤەرە شەهید بوون، بەرگریكردنی خەڵك لە خاكی كوردستان ئەركی ئێمە هەموومانە، بەڵام ڕۆڵی ئەم دەڤەرە لە بەرگریكردن لە كوردستان، لە هەموو قەزا و ناحیە و پارێزگاكانی كوردستان، جێی تەقدیرە و سەری ڕێز و نەوازش بۆ بنەماڵەی سەربەرزی شەهیدان نەوی دەكەین و دەستخۆشی لە پێشمەرگە قارەمانەكان و خەڵكی قارەمانی ئەم دەڤەرەش دەكەین.
هەقی ئێوەیە هەرچەندە خزمەتی ئێوە بكرێت، بەڵام من دەمەوێ بە ڕاشكاوی باسی ئەوە بكەم كە بەشێك لەو كێشانەی كە هەتا ئێستا بەپێی پێویست خزمەت نەكراون، نەبوونی ئیمكانیات بووە، وەكوو پێویست ئەو توانایەمان نەبووە، رەنگە بێ چانسیش بووبین، كاتێك كابینەمان وەرگرت بەداخەوە نەخۆشیی كۆرۆنا هەموو كوردستان و هەموو دونیای گرت. لە لایەكی دیكەوە نرخی نەوت زۆر زۆر دابەزی و جموجۆڵی بازرگانی لە كوردستان تەقریبەن نەما، حكوومەتی فیدرالیش بودجەی هەرێمی بڕی كە هێشتا ئەم مەسەلەیە چارەسەر نەبووە. ئەم بابەتە ئابوورییانە، فشارێكی زۆریان خستە سەرمان، وای كرد ئێمە نەتوانین بەو شێوەیەی كە پێویستە خزمەتی كوردستان بە شێوەیەكی گشتی بكەین. هەرچەندە ئەم دەڤەرە پێش ئێستاش بە داخەوە، خزمەتگوزارییەكی دادپەروەرانەی بە شێوەیەكی ڕێژەیی لەسەر ئاستی كوردستان بۆ نەكراوە. زۆرجار بایەخ بە دەڤەرێكی دیكە دراوە، بەڵام ئەم دەڤەرە وەكوو پێویست گرنگی پێ نەدراوە، ئێمە هەوڵمان دا بەو توانایەیشی هەیە كەمێك قەرەبووی ئەو خزمەتگوزارییانە بكەین كە بۆ ئەم دەڤەرە ئەنجام نەدراوە، بۆیە من لەگەڵ جەنابی پارێزگار و بەرپرسانی حكوومەت زۆر چووینە نێو بابەتەكە تا بزانین چ پێویستە بۆ خەڵكی ئەم دەڤەرە بكرێت، ئەو پرۆژە ستراتیژی و گرنگانەی كە لەسەر داخوازی خەڵكی دەڤەرەكە خۆیان بووە، سەیر بكەین بزانین چیمان پێ دەكرێ ئەوەیان بۆ جێبەجێ بكەین.
من دڵخۆشم كە لەو دوو سێ ساڵەی رابردوودا خزمەتێكی بەرچاو كراوە، هێشتا لە ئاستی خواستی ئێمەدا نییە و لە ئاستی خزمەتكردنی ئێوەشدا نییە، بەڵام ئێمە هەر ئەوەندەمان پێ كراوە، هەر كاتێك توانای زیاترمان بەدەستەوە بێت، دڵنیا بن ئێمە گرنگیی زیاتر بە ئێوە و ئەو ناوچەیە بە شێوەیەكی گشتی دەدەین.
من نامەوێ بچمە سەر هەندێك بابەتی مێژوویی ئەم دەڤەرە كە چەندە كۆنە و لە ڕووی دیرۆكییەوە جێی گرنگیی ناوەوە و دەرەوەی كوردستانیشە، بەڵام من دەمەوێ باسی دۆخی ئێستای هەردوو قەزا بكەم كە خەڵكی ئێمە لە ڕووی ژمارەی دانیشتووانی هەردوو قەزاوە گەلێك زیادیان كردووە، پێویستییەكانی ئەوان لە زۆر ڕووەوە زیادی كردووە، یەكێك لەو هۆكارانەی كە ڕاستییەكەی هەندێك سەردانی منی دواخست، ئەوەبوو كە حەزم كرد ئەو پڕۆژە ئاوەی بۆ ئاكرێ دەكرێ، تەواو ببێ و پاشان بێین بۆ ئێرە، بەڵام مخابن دیارە تا ئێستا تەواو نەبووە، ئەویش ئەو كۆمپانیایەی كە گرێبەستی لەگەڵ حكومەت هەیە، پێی نەكراوە پابەندییەكانی خۆی جێبەجێ بكات، بۆیە ئێمە دوا ئاگاداركردنەوەمان بە كۆمپانیاكە داوە كە ئەگەر ئەو پڕۆژەی ئاوە جێبەجێ نەكرێت، ئەوا ئێمە هەندێك بڕیاری دی وەردەگرین.
لێرە هەندێك بابەتی دیكە هەن پێش ئەوەی بچمە نێو پرۆژەكان، من دەمەوێ بە شێوەیەكی گشتی باسی بكەم، ئەم ناوچەیە وەك هەموو ناوچەیەكی دیكەی كوردستان، جێی پێكەوەژیانی ئایین و نەتەوەییە، لەو ناوچەیەش خەڵكی باوەڕدار چ بە دینی ئیسلام، یان دینی مەسیحیەت یان ئێزدی، پێكەوەژیانی ئاشتییانەیان هەیە لەنێوان میللەتدا، جێی تەقدیر و پێزانینە، دەزانم هەندێك كێشەی زەوی و گوند هەن كە كێشەی یاسایین، حەز ناكەم وا لێك بدرێتەوە كە حكومەت پشتی دین و مەزهەب و نەتەوەیەک دەگرێت لە دژی نەتەوەیەکی دیكە، بۆ ئێمە پێوەری حكومڕانی، دادپەروەرییە، ئێمە پشتی دادپەروەری دەگرین، هەق لای كێیە ئێمە پشتی هەق دەگرین. بۆیە من حەز دەكەم دڵنیایی بدەمە هەموو خوشك و برایانی ئێمە چ مەسیحی بن و چ موسوڵمان بن، هەر كەسێك غەدری لێ كرابێ و زەوییەكەی داگیر كرابێ و ئەرزەکەی بە ناهەق داگیركرابێ، لە ڕێگەی یاساوە ئەو زەوییە بۆ خاوەن زەوییەكە و خاوەن هەقەكە دەگەڕێتەوە، گرنگ ئەوەیە كە پێویستە ئەو پێكەوەژیانی ئایینی و ئیتنییەی لە كوردستان هەیە، زیاتر گرنگی پێ بدەین، چونکە پێکەوەژیان شتێكیشە بۆ ئێمە بۆتە جێی شانازی لە هەموو دونیا، كاتێك باسی كوردستان دەكەن، باسی پێكەوەژیانی ئایین و نەتەوەكان دەكەن.
بابەتێكی دیكە كە پێویستە گرنگی پێ بدرێ لەم دەڤەرە، بابەتی گەشتوگوزارە، چیای جوان و دۆڵی زۆر جوان لەم ناوچەیە هەیە، بەڵام بەداخەوە زۆر لەو دەرفەتانە نەمانتوانیوە سوودیان لێ وەربگرین، هەروەك من گوتم رەنگە بەشێكی لەبەر بێ توانایی بووبێت، بەڵام بەشێكیشی لەبەر بوونی هەندێك گرووپ بە تایبەتی پەكەكە لەو چیایانەیە كە ڕێگربوون لە گەیاندنی خزمەتگوزاری بۆ هەندێك گوند یان گەڕانەوەی خەڵكی ئێمە بۆ سەر گوند و زەوییەكانی خۆیان و گرنگیدان بەو دەڤەرانە بۆ لایەنی خزمەتگوزاری.
داواكاریی ئێمە ئەوەیە ڕێز لە یاسا و دەسەڵاتی شەرعیی هەرێمی كوردستان بگیرێت، واز لە ڕێگری بێنن، واز لە تەعەداكردن لە خەڵكی ئێمە بێنن، ڕێگە بدەن حكومەت خزمەتگوزاری بگەیەنێتە هەموو شوێنێك، ئەم ڕێگە و بەرنامەیەی هەیە وەك حكومەت دەیەوێ بێتە جێبەجێكردن، چونكە بێگومان ئێمە زیاتر مەبەستمانە خزمەتی خەڵكی خۆمان بكەین بەبێ فەرق و جیاوازی لە هەر جێیەك بێت.
كاك عەلی تەتەر باسی لەوە كرد كە لە ماوەی رابردوودا لە سنووری 257 ملیار دینار پرۆژە بۆ ئەم دەڤەرە هاتۆتە تەرخان كردن و جێبەجێ كردن، بەشێك لەوانە كەرتی تایبەت جێبەجێی كردووە و هەندێكیان بە قەرزیش كراون، بەڵام گرنگ ئەوەیە جێبەجێ كراون، لێرەوە جێی خۆیەتی كە سوپاسی كەرتی تایبەت بكەم بۆ ئەوەی كە هاریكار بوون لەگەڵ حكوومەت و لەگەڵ خەڵكی ناوچەكە. هەروەها جێی خۆیەتی سوپاسی دەزگای خێرخوازیی بارزانیش بكەم كە ئەوانیش ڕۆڵێكی زۆریان هەبوو بە تایبەت لە ئاواكردن و نۆژەنكردنەوەی قوتابخانە لەم دەڤەرەدا.
ئەو بەرنامانەی دیكە كە هەن، وەك من حەز دەكەم ئەو موژدەیە بە ئێوە بدەم كە ئەو پرۆژانەی هاتۆتە بەر دەستی ئێمە، لە سنووری 24 ملیار دیناری دیكە ڕەزامەندیمان لەسەر داوە كە پرۆژە بۆ هەردوو قەزای ئاكرێ و بەردەڕەش جێبەجێ بكرێن كە ئەوانیش بۆ (ئاو، ئاوەڕۆ، شەقام، ڕێگەوبان، قوتابخانە و بابەتی وەرزشی و هەندێك بابەتی دیكەشن).
من باسی پرۆژەی ئاوی ئاكرێم كرد، دیسان گرنگی بەم پرۆژەیە دەدەین چونكە زۆر زۆر گرنگە و پێویستە پەلە لە جێبەجێكردنی بكرێت.
ناوچەی ئێوە ناوچەیەكی كشتوكاڵییە جگە لەوەی لە ڕووی گەشتوگوزاریش دەكرێ گرنگیی زیاتری پێ بدرێت، بەڵام لە ڕووی كشتوكاڵییەوە یەكێكە لە گرنگترین و پڕ خێروبەرەكەتترین ناوچەی هەرێمی كوردستان، ئێمە لە دەستپێكی ئەم كابینەیە بڕیارمان ئەوەبوو كە داهات و ئابووریی خۆمان فرەچەشن و هەمەجۆر بكەین و لە كوێ دەتوانین داهاتی خۆمان زیاد بكەین و تەنیا پشت بە نەوت و غاز نەبەستین. كشتوكاڵ یەكێك بوو لەو بابەتانەی كە ئێمە خۆمان زۆر زۆر گرنگیمان پێ داوە و وەبەرهێنانمان تێدا كردووە، ناوچەی ئێوە یەكێكە لەو ناوچانەی كە پێی دەكرێ نەك تەنیا خێر بە خۆتان بگەیەنن، بەڵكوو سوود بە هەموو كوردستان و ناوچەكەش بگەیەنن.
تەكنەلۆژیای تازە هاتۆتە پێشەوە، ئێمە بەردەوام لەگەڵ وڵاتانی دۆست و خەڵكی شارەزا و پسپۆڕ، جووتیارانی ناوخۆ و وەزارەتی تایبەتمەند لە گفتوگۆداین كە ئێمە چۆن بایەخ بە كەرتی كشتوكاڵی بدەین. من لەو باوەڕەدام كە بە توانای كەمتر و هەرزانتر، ئاوێكی كەمتر بەفیڕۆ بدرێت، بەرهەمێكی زیاتر بە كوالێتییەكی باشتر ئێمە دەتوانین لەم دەڤەرە بەرهەم بهێنین، ئێمە بە هەموو جۆرێك هەوڵدەدەین بەردەوام بین و هاوكاریی جووتیارانی خۆمان بكەین ئەوەی پێیان بكرێ، سوود لە تەكنەلۆژیای نوێ و زانستی نوێ بكەن، بەرهەمی خۆیان زیاتر بكەن و تێچوونی خۆشیان كەمتر بكەنەوە. ئەمە دەبێتە داهاتێكی زیاتر بۆ خەڵكی ناوچەكە، دەبێتە دەرفەتێك بۆ ئەوەی كار زیاتر ببێت و گەنجانمان زیاتر بچن كار بكەن. من زۆر جار ئەوەم گوتووە كە پەرەپێدان بە كەرتی كشتوكاڵی تەنیا سوودی لە كەرتی كشتوكاڵیدا نییە، كاتێ كشتوكاڵ زیاد دەبێ، پیشەسازی و بازرگانی و كار و داهات زیاد دەبێ، لەبەر ئەوە بنەمای پێشخستنی ئابووریی هەر وڵاتێك، پەرەپێدانە بە كەرتی كشتوكاڵی، ناوچەی ئێوە ناوچەیەكی زۆر بەخێرە و ئێمە لە هەموو ڕووێكەوە هەوڵ دەدەین زیاتر گرنگی پێ بدەین.
دوو پرۆژەی ستراتیژی هەن، یەكەم: دروستكردنی بەنداوی ئیسماوا و باكرمان، دووەمیان بەنداوی مەنداوایە، ئەوەیان لەسەر زێی گەورەیە لە نێوان هەولێر و ئێرە.
ئەم دوو بەنداوە بێگومان كاریگەرییەكی زۆر ئەرێنی لەسەر پێشخستنی كەرتی كشتوكاڵی، گەشتوگوزاری، پیشەسازی، دروستكردنی دەرفەتی كار بۆ خەڵكی ناوچەكە دەكەن. دوێنێ وەزیری ئاوی حكوومەتی فیدرالی لای من بوو، ئێمە لەسەر ئەو بابەتانە بە دوور و درێژی گفتوگۆمان كرد، ئەوانیش ئامادەن هاوكار بن بۆ جێبەجێكردنی ئەو پرۆژانە، ئێمە بە نیازین زیاتر هەنگاوی كرداری بنێین بۆ ئەوەی بزانین كەی جێبەجێ دەكرێن، ئیشەڵا ئەوەی لەسەر ئێمە بێت كەمتەرخەمی ناكەین.
ئێمە هەوڵمان دا لەم كابینەیە بەرهەمی ناوخۆیی بنێرینە دەرەوە، پار بۆ یەكەمجار جگە لە بەرهەمی نەوت و غاز، ئێمە هەناری هەڵەبجە و زاخۆمان ناردە وڵاتانی كەنداو، پێنج وڵاتی كەنداو هەناری كوردستانیان وەرگرت و ویستێكی زۆریشیان لەسەر بوو. ئەمساڵ ئەو بەرنامەیەی هەیە بۆ زیادكردنی بەرهەمی خۆماڵیی هەرێم كە بیاننێرینە دەرەوە وەكوو سێو و ترێ، بە تایبەتی لە ناوچەی ئێوە (برنج، پەتاتە، هەنجیر و سماق و ئەو شتانەی دەكرێ ببنە بەرهەمی زۆر باش لەسەر ئاستی جیهان) كە دەكرێ ویستێكی زۆریشیان لەسەر هەبێ. ئەمانە دەكرێ ببنە سەرچاوەیەكی داهاتی زیاتر بۆ خەڵكی ناوچەكە و پاڵپشتێكیش بۆ حكوومەتی هەرێم.
ڕێژەی گەنجان لە كوردستان بە شێوەیەكی گشتی و بە تایبەتیش لەم دەڤەرە وەك من بیستوومە زۆرە، گەلێك لەوانە چاویان لە دامەزراندنە، پێش هەموو شتێك من حەز دەكەم داوایەك لە دایك و باوكان بكەم، ڕێگە لە منداڵانی خۆیان نەگرن بە تایبەتی لە كچان كە بچنە قوتابخانە، هیوای من ئەوەیە پشتیوان بن، چونكە زانست زیاتر پشتیوان دەبێت بۆ پێگەیاندنی كۆمەڵگەی ئێمە، فەرق و جودایی لە نێوان كچ و كوڕان نەبێت، چ لە بەرگری و چ لە پێگەیاندن و چ دكتۆر و ئەندازیار و پارێزەر و سیاسی بێت، ئافرەت هیچی لە پیاو و مێران كەمتر نییە، هیوای من ئەوەیە پاڵپشت بن و ڕێگەی لێ نەگرن. داواش لە هەموو گەنجانمان دەكەم، بیر لەوە بكەنەوە كە خۆیان پێیان دەكرێ چ پرۆژەیەك جێبەجێ بكەن حكومەت پشتیوان دەبێت بۆ پرۆژەكانی ئێوە، پرۆژەی تایبەت. هەر كەسێك فكرەی هەبێ و پێی بكرێ پرۆژەیەك جێبەجێ بكات كە حكوومەت پاڵپشتی لێ بكات و كۆمەڵێك كەسیش لەگەڵ خۆی بخاتە سەر كار، گەلێك لەوە باشترە كە چاوی لەوە بێت ببێتە فەرمانبەرێك لە حكوومەت. با حكوومەت لە دوای ئێوە بگەڕێت، حكوومەت مەمنونیش بێت ئێوە بێن كاری بۆ بكەن، بەڵام ئێوە مەجبوور نەبن تەنیا كارتان لە حكوومەت بێت. واتە ئەگەر ئێمە ئاستی ئابووریی وڵاتی خۆمان بگەیەنینە جێیەك كە كەرتی تایبەت یان خەڵكی ئێمە پێی بكرێ كاری تایبەتیی خۆی هەبێت و ناچار نەبن بۆ ژیانی خۆیان تەنیا چاویان لە حكوومەت بێت، بزانن ئەوكات ئێمە دەتوانین بڵێین كە وڵاتی ئێمە پێشكەوتووە یان هەنگاو بۆ پێشكەوتن دەنێت. لەبەر ئەوە داوا لە ئێوە هەموان دەكەم بیر لەوە بكەنەوە كە چ پرۆژەیەكتان هەیە تا حكوومەت بتوانێت هاوكاریی ئێوە بكات و پرۆژەكانی ئێوە ببێتە بنەما بۆ پێشخستنی ئابووریی ئێمە.
من بیستم كە بەداخەوە لەسەر ئاستی هەموو كوردستان، سێ شەفت هەبوون لە قوتابخانە یان هەندێك قوتابخانە بەداخەوە بەتایبەت لەم ناوچەیە هێشتا رەنگە مابن. من بە تایبەت لەگەڵ وەزیری پەروەردە قسەم كرد، ڕێژەی ئەو سێ شەفتی قوتابخانانە لەسەر ئاستی هەموو كوردستان زۆر زۆر كەمبوونەتەوە، زۆر قوتابخانەی تازەشمان كردۆتەوە یان هەندێك پۆلی قوتابخانەمان زیاد كردووە و هەندێك لەو قوتابخانانەی پێویستیش بوون، ئێمە نۆژەنمان كردوونەتەوە. بەڵام ئەو قوتابخانانەی ماون، ئێمە لە بەرنامەماندایە قوتابخانەی نوێ دروست بكەین ئیشەڵا.
لێرەوە دەمەوێ موژدەیەكی دیكەش بە ئێوە بدەم كە زانكۆی ئاكرێ ( زانکۆی زانستە کردارییەکانی ئاکرێ) دادەمەزرێنین، هیوادارم ئەم زانكۆیەش خزمەتێكی زیاتری ئەو دەڤەرە بكات، لە هەمان كاتدا لێرەدا دەمەوێ ئەوەش ڕابگەیەنم كە زانكۆی پۆلیتەکنیکی گەرمیانیش ئینشەەڵڵا دادەمەزرێنین و ئەو زانكۆیەش لە خزمەت خەڵكی ئێمە لە دەڤەری گەرمیان دەبێت.
خەڵكی ئێرەش وەك جێگەكانی دیكە، وەرزشوانی زۆری هەیە، چاوەڕێین پاڵپشتیی وەرزشیش بكرێ، ئێمە لە پاڵپشتییەكانی خۆمان و وەك شەخسیش من هاریكار دەبم ئیشەڵا بۆ هەندێك لەو پرۆژانەی داوا كراوە لە (دینارتە، ئاكرێ، بەردەڕەش)، ئەو پاڵپشتییانەی پێویستن بۆ یانە و تیمە وەرزشییەكانی ئەم دەڤەرەش ئینشەئەڵڵا بەردەوام دەبین و پشتیوان دەبین.
جارێكی دیكە من داوا لە ئێوە هەموان دەكەم، هاریكار بن بۆ حكومەت، هاریكاریی خۆتان و وڵاتی خۆتان بكەن لە پاراستنی ژینگەی خۆتان، ژینگەپارێزی بۆ ئێمە باوەڕ بكەن زۆر زۆر بەسوودە، زۆر بەداخەوە زۆرجار ئێمە دەبینین كە خەڵكی دەچێتە دەرەوە، ئەو دیمەنە جوانانە هەن، زبڵ و پیسایی جێدێڵن، زۆر زۆر جێی داخە، پێویستە پەروەردەی دایك و باوكان وا نیشان بدات كە كوردستان ماڵە گەورەكەی ئێمەیە، كەس زبڵ ناكاتە بەر دەرگای خۆی، لە هەمان كاتدا پێویستە زبڵیش نەخەنە سەر جادە یان كە دەچنە دەرەوە، پاكوخاوێنی رابگرن و داران نەبڕن و زەرەر لە وڵاتی خۆتان مەدەن، ئیشەڵا ئەم وڵاتە بە كەڵكی ئێمە هەموان دێت.
هەروەها هیوادارم لە بابەتی لێخووڕینی ئۆتۆمبێل لە سەرخۆ بن. چونکە زۆرجار گوێمان لێ دەبێت كە ڕووداوی ناخۆش ڕوودەدات، بەشێك لەوانە لەسەر لێخووڕینە بە خێرایی، هیوادارم ئەوەش لەبەرچاو بگرن، سەلامەتیی خۆتان زیاتر لەبەرچاو بگرن.
خاڵێكی دیكەی لە هەموان گرنگتر، من حەز دەكەم و زیاتر مەبەستم لێی گەنجانە، ئێوە باوەڕتان بە وڵاتی خۆتان هەبێت. هیچ وڵاتێكی پێشكەوتوو چاوی لەوە نەبووە خەڵكێكی دی بچێت كاری بۆ بكات، بە خۆیان بۆ خۆیان كردووە، دەبێ ئێمە بە خۆمان بۆ خۆمان بكەین، بەڵام پێش ئەوەی كار بۆ خۆمان بكەین، دەبێ باوەڕمان بە خۆمان هەبێت كە ئێمە ئەو توانایەی هەمانە دەتوانین وڵاتی خۆمان بەرەوپێش ببەین. راستە حكوومەت دەیەوێ خزمەتی ئێوە بكات، ئەوەی لەسەریشمان دەیكەین و رەنگە زۆر شتمان كردبێ و تا ئێستا دیار نەبێت. خزمەتكردن تەنیا دروستكردنی شەقام و باڵاخانە نییە. زۆر بابەتی دیكە هەبوون، بۆ نموونە كۆكردنەوەی داتا و گەیاندنی خزمەتگوزاری بۆ ناوچە دوورەدەستەكان یان ئەلیكترۆنیكردنی خزمەتگوزاری و نەهێشتنی رووتین، ئەمانە هەمووی بەرنامەن كە حكومەت زۆر بە جددی كاریان لەسەر دەكات بەڵام ڕەنگە هەمووی نەبینرێت، بەرهەمی ئەوانە هێدی هێدی دەردەكەوێت لە داهاتووێكی نزیكدا دەبینن كە ئێمە چیمان كردووە و هەنگاوی زۆر باشتر دەهاوێژین و زیاتر خزمەتی ئێوە دەكەین، ئێوەش سوودمەند دەبن لەو بەرنامەی خزمەتگوزارییانەی حكومەت، بەڵام زیاتر لە هەموو شتێك باوەڕتان بە خۆتان هەبێت و گوێ نەدەنە دەنگی خەڵكێك كە ئێوە بێ هیوا بكەن و لە وڵاتی خۆتان دوورتان بخەنەوە، یان خۆشەویستیی خاك و وڵات لە دڵی ئێوە ڕەش بكەن، هیوای من ئەوەیە وەڵامیان بدەنەوە كە چۆن پێشمەرگەی ئێمە بە دەست و بازووی خۆیان بەبێ هیچ توانایەك وەك چۆن رۆحی خۆیان كردە قەڵغان بۆ پاراستنی ئەم وڵات و خاكە و بەرگرییان لە وڵاتی خۆیان كرد، ئێوەش بە ئیرادەیەكی توند و قاییم بەرگری لە وڵاتی خۆتان بكەن و بەرگری لە دژی هەموو ئەو پروپاگەندانە بكەن كە ناحەزان دەیكەن، بەردەوام بن لە ئاوەدانكردنەوەی وڵاتی خۆتان و هاریكاریكردنی حكومەتی خۆتان، ئێمەش چیمان پێ بكرێت زیاتر خزمەتی ئێوە دەكەین.
من زیاتر كاتی ئێوە ناگرم، هیوادارم هەموان ساخ و سەلامەت بن و ئینشەڵا كوردستانی ئێمەش ڕۆژ بە ڕۆژ ئاوەدانتر دەبێت.